كشف الفنان المصري كريم سرور عن إصابته بفروس “كورونا” المستجد، لافتا إلى أن الموجة الثانية للفيروس لها أعرض مختلفة.
سرور كتب، على حسابه بموقع “الفيس بوك”: “كنت متردد جداً فى كتابة البوست ده بس قلت لازم الناس تعرف عشان تاخد بالها و لله الأمر من قبل و من بعد .. أعراض ڤيروس كورونا المستجد (الموجة التانية من الڤيروس) هو إصابة الجهاز الهضمى قبل التنفسى”.
وأضاف: “فيه أعراض أولية معروفة و شائعة زى تكسير شديد فى الجسم و سخونية عالية جداً وبتنزل فجأة بدون مبرر وفجأة تعلى تانى اوى ، ضيق فى التنفس برضه مش طول الوقت خفقان فى القلب و زيادة سرعة ضرباته بشكل يخوف جداً فقدان الشهية و عدم الاحساس بالطعام”.
وتابع: “أما الأعراض المستجدة بالنسبة للمعروف للناس هو ألم شديد فى البطن .. المعدة والقولون ، اسهال شديد و شوية و بيقلب بإمساك شديد .. ألم المعدة بيمتد للجناب و الضهر و احياناً الرقبة .. وحاجة كدة اشبه بحالات الإغماء بتستمر لمدة ١٠ دقايق او نص ساعة بالكتير و ده أظن بسبب مقاومة الجهاز المناعى للڤيروس لأنه ساعتها بتكون درجة حرارتى عالية جداً .. شعور مستمر بالقيئ بس مبيحصلش و اظن دى طبيعة جسمى أنا عادة مبرجعش خالص”.
وأكمل: “الأعراض غير مستقرة و بتيجى و تروح وتقل و تزيد و الثابت فيها هو عدم القدرة على التنفس بشكل جيد ( كأن فيه حاجة على صدرك ) و ألام شديدة فى البطن .. دى الأعراض اللى عندى بقالها ١١ يوم و أنا كنت فاكر إنها من القرحة المزمنة اللى عندى لحد ما حللت و التشخيص كان إصابتى بڤيروس كورونا المستجد”.
واختتم كلامه بقوله: “الأعراض كانت شديدة جداً و لا تحتمل فى أول ٤ أو خمس ايام و بعدين بدأت تقل لكنها فجأة بتزيد جداً .. بس انا احسن دلوقتى الحمدلله إتمنولى الشفاء و أى حد خالطنى فى آخر ٢٥ يوم يتأكد إنه تمام بس .. أسف جداً أكيد مكنتش اعرف ، شكراً”.
يُذكر أن كريم سرور ممثل ومخرج شارك في عدد من الأعمال الفنية، منها مسلسل “الأب الروحي”، ومسلسل “فرصة تانية”، و”شاهد عيان”، و”قمر هادي” و”كلبش” و”رحيم”.
