كشفت الفنانة شيرين رضا عن تفاصيل حياتها مع والدها الفنان الراحل محمود رضا، وكيف تأثرت برحيله وما تركه من أثر بداخلها في الباقي من عمرها، وقالت: بابا هيبقى أول فصل في كتاب حياتي، كان راجل “لذيذ جدا” وكان عاوز يعلمني المسئولية من وأنا صغيرة.
وتابعت شيرين، خلال لقائها مع المذيعة مها الصغير ببرنامج “its show time”: كان يقولي اتصرفي انتي فكري انتي، لأنه علمني كل حاجة أنا عرفاها، علمني الصبر والاحترام وإني أفهم إنه مش كل الناس رأيها هيبقى زي رأيي، وطبعًا واضح إني متعلمتش الحاجة دي كويس.
وتابعت: مكنش فيه صدام بينا، بس هو كان شايف إني قليلة الأدب، لأن بابا عمره ما قال كلمة وحشة أو قال إن البني آدم دا وحش، فكان بيبقى مصدوم فيا، انتي ازاي بتقولي الكلام دا.
كما صرحت أنها دائما ماتواجه انتقادات أو تنمر بسبب تصريحاتها الجريئة والجادة، ولكنها اعتادت مثل هذه الانتقادات ولاتكترث لها، وعن تكريم والدها مؤخرا في مهرجان الجونة السينمائي الدولي قالت: «انبسطت جدا أن مهرجان الجونة كرم محمود رضا في دورته الأخيرة، وهو يستاهل ويستحق هذا التكريم لأنه أمتعنا كثيرا، قالولي قبلها، وحاولنا نجهز كلمة لطيفة مبتقاش حزينة أو تابين، بل احتفاء به، فقلت جملة أبويا كان عايزني أطلع رقاصة التي لم تعجب البعض».
وتحدثت «شيرين» عن حلم والدها ورغبته في ان تسير على طريقه، لكنها لم تحقق له هذا الحلم، وهو ماحاولت نقله بجملة «كان عايزني أطلع رقاصة» وليس بالمفهوم السئ الذي عرضها للانتقادات.
وعلقت «شيرين» حول الانتقادات التي تعرضت لها بسبب هذه الجملة: «يتفلقوا، إللي عايز يفهم بطريقته يفهم، أنا مش هروح أصلح دماغ كل الناس» ردا على هجوم رواد مواقع التواصل عليها بعد جملة «أبويا كان عايزني أطلع رقاصة» التي قالتها خلال كلمة تكريمها في حفل افتتاح مهرجان الجونة السينمائي الدولي مؤخرا.
وتابعت:«التنمر زاد قوي وبقى صعب ،وفيه تنمر لطيف، زي ماقالوا على فستاني عشان تصميمه فيه أجنحة إن فيه غوريلا بتجري ورايا، طب مافيه حاجات لطيفة وممكن نتقبلها، وكلنا بنتريق كمصريين، بس فيه تريقة بقت صعبة قوي».
وتابعت: «هيكتبوا على السوشيال ميديا حاجة كويسة هتعرفي إن البني آدم ده جواه جمال، هيكتبوا حاجة سيئة هتعرفي إن عمره لا شاف حاجة كويسة ولا شاف جمال».
