دخلت الفنانة المصرية إيمي سمير غانم في حالة حزن شديدة بعد وفاة حماتها والدة زوجها الفنان حسن الرداد.
إيمي سمير غانم نشرت صورة جمعتها بحماتها وزوجها حسن الرداد، على حسابها الخاص على موقع “انستجرام”، ونعتها بكلمات حزينة، بقولها: “إنا لله وانا اليه راجعون.. الله يرحمك يا حبيبه قلبي حماتي وصاحبتي و امي .. هيوحشني حبك ليا و بوستك ليا كل يوم الصبح”.
الفنانة المصرية تابعت: “فاديه الرداد يا اعظم ام و احن قلب طول عمرك في ضهري و واقفه في صفي عشان حبتيني زي ما بحبك.. ربنا يرحمك و اشوفك في الجنه و احضنك.. بحبك”.
ونشر الفنان حسن الرداد صورة جمعته بوالدته من أمام الكعبة، ونعاها بكلمات مؤثرة، بقوله: ” توفت الى رحمة الله تعالى والدتى أحن و اطيب ام فى الدنيا السيدة / #فادية_الرداد”.
الفنان المصري أضاف: “مع السلامة يا أغلى و اطيب أم فى الدنيا، سلمى لى على فادى و بابا، إن شاء الله نتجمع كلنا فى الجنة يا رب.. ( إنا لله و إنا اليه راجعون)”، وقد تلقى الكثير من تعليقات التعازي والمواسة من جمهوره.
وشيّع حسن الرداد جنازة والدته بمسجد عمرو بن العاص بجوار منزل الراحلة بمسقط رأسها بمحافظة دمياط، وتم دفنها بمقابر العائلة هناك.
ووالدة حسن الرداد هي فادية الرداد حرم الراحل نبيل الرداد، القيادي السابق بالحزب الناصري، ووالدة الفنان حسن الرداد، والدكتورة نيبال الرداد، وفادي الرداد الذي رحل عن عالمنا منذ سنوات.
والدة حسن الرداد ظهرت من قبل خلال لقاء لنجلها مع برنامج “الستات مايعرفوش يكدبوا” على قناة cbc، وتحدثت عن ابنها حسن، بقولها: “أكتر حاجة بحبها في حسن أنه إنسان طيب جدا، وعطوف على الناس، وبار بيّا جدا، وبيحاول يرضيني بكل الطرق، ودايما بيجي على نفسه عشاني، وبيجامل كتير جدا، وده بيجهده وبيرهقه”.
وتابعت: “حسن وارث طيبة والده ورجولته وجدعنته وشهامته، وهو راجل بيتوتي جدا، وبيحب البيت والأسرة، بيحب يطلع معانا أي مكان، وبيحب نكون معاه في أي حتة، وبيختلي نفسه جوه البيت، هو بيفضل القعدة معانا دايما”.
وعن رأيها في عمله في التمثيل، قالت في مداخلة ببرنامج “العاشرة مساءً” على قناة “دريم”، أنها تحب التمثيل وتشجع ابنها منذ صغره، حيث قالت: “كنت بشجعه طول عمره يمثل، وأنا كمان كنت غاوية تمثيل زمان، لكن العيلة رفضت، حسن بقى الحمد لله قام بالواجب وحقق طموحاتي، عمل اللي نفسه فيه وكان من صغره نفسه يبقى فنان أو لاعب كرة، كان بيقلد شعبان عبد الرحيم كويس”.
وعلق حسن الرداد: “ماما هي اللي بتقلد كويس جدا، أنا ورثت الموضوع ده منها، هي فظيعة في الموضوع ده، أعتقد أن حب التمثيل عندي هي جينات أخدتها من ماما، وهي دمها خفيف جدا”.
وكشفت والدة حسن الرداد عن وصيتها له، في مداخلة لها ببرنامج “تحت السيطرة” على قناة “النهار”، بقولها: “وصيتي لحسن أنه يتمسك بأخلاقه اللي تربى عليه، هو شهم وراجل وحنين وصاحب صاحبه وجدع وتحمل مسئوليتي أنا وأخته من وهو صغير، كل اللي بيحبهم بيبقى مهتم بهم”.
وأضافت: “وبحذره دايما من أنه يقع في إيد حد ينخدع فيه، بقوله إني بحبه جدا، وبحب إيمي، وعايزاهم تبقى حياتهم سعيدة على طول، وربنا يرزقهم ببنين وبنات، وملهمش دعوة بالحاجات اللي بتتكتب عنهم دايما، كله كذب وكلام فارغ ولا خلافات ولا متاعب ولا مشاكل ولا أي حاجة، وربنا يكرمهم يا رب بـ6 عيال كفاية”، وهو ما تسبب في بكاء حسن على الهواء.
