حرصت أميرة مختار، ابنة الفنانة المصرية الراحلة رجاء الجداوي، على إحياء ذكرى ميلاد والدها الراحل الكابتن حسن مختار، ونشرت مجموعة صور نادرة جمعت الفنانة الراحلة بزوجها.

ابنة رجاء الجداوي أرفقت الصور، التي نشرتها على حساب والدتها الراحلة على موقع “انستجرام”، بتعليق قالت فيه: “كل سنه وانت في قلب كل الي بيحبوك.. ويارب تكونوا مع بعض ربنا يرحمكم ويغفر لكم”.

يذكر أن زواج الفنانة رجاء الجداوي من الراحل حسن مختار لاعب الكرة بنادى الاسماعيلي تعد من أطول حالات الزواج في الوسط الفني، حيث جمعتهما قصة حب تعتبر درسا لكل العشاق، فرغم رحيله منذ عدة سنوات ألا أنها كانت قد أخذت عهد على نفسها بأنها ستظل متزوجة منه حتى أخر لحظات، وبالفعل لم تتزوج مرة أخرى حتى وفاتها.

ففي مطلع السبعينيات، كانت بطولة الأمم الأفريقية مقامة بالسودان وكان ضمن بعثة المنتخب الوطني وتزامن وجود الفنانة رجاء الجداوي مع فرقة تحية كاريوكا المسرحية لتقديم عدة عروض هُناك، وكشفت “رجاء”، تفاصيل علاقتها بزوجها في لقاء سابق لها ببرنامج “السفيرة عزيزة”، قائلة” “الحب جه بعد الجواز”.

وأضافت: “مكنتش أعرفه، ولا بفهم في الكرة، واتقابلنا مع محمود المليجي، كنا في السودان، وعملت مكياج المسرح، وكنت أوفر شوية”، موضحة: “كنت في نفس الفندق اللي هو نازل فيه، لفت نظري إيديه ورجليه، وكان حاطط رجله على سور البلكونة، وماسك كتاب بيقرأ فيه، وسألت عليه قولتلهم مين المثقف ده، وعرفته، لكن هو معبرنيش، الست لما الراجل يتجاهلها يلفت نظرها أكتر”.

وروت “رجاء”، تفاصيل أول حوار دار بينهما، قائلة: “اتقابلنا في الفندق، وقالي النهاردة شكلك عدل، لأنك امبارح كنتي عاملة زي البلياتشو، وقالي شكلك حلو، واتريق على شغلي لما قلتله إني مانيكان، وأنا رديتها له لما قالي إنه بيشتغل لاعب كرة”.

وتابعت: “طلب إيدي في الطيارة، وقالي عاوز أتجوزك، وهتجوزك، وعمري ما قلت حاجة ومعملتهاش، لكن أنا قلتله أنا أكبر منك، وقالي إنه بيقبض 55 جنيه، ولما بيصد كرة بياخد 5 جنيهات، لكن أنا رفضت وقلت يا مصيبتي، وهو قالي هتجوزك يعني هتجوزك”.

وأوضحت: “لما وصلنا مصر، خد رقم التليفون، وكلمني تاني يوم، وطلب يقابلني، لكن أنا رفضت في الأول، وبعدين اتقابلنا عند سينما رمسيس، مضيفة: “قالي مش هنقعد وهنشتري الدبل على طول، كان معايا 12 جنيه، وهو كان معاه 18 جنيه، فاشترينا دبلتين بـ31 جنيه، رغم إن اللي معانا كانوا 30 جنيه، فكتبوا على دبلتي حسن محتار، وكتبوا على دبلته رجاء الجداوي: “كانوا أحلى 46 سنة جواز”.

توفى حسن مختار في عام 2016، وانهارت رجاء بعد فقدانه وقالت في لقاء سابق لها والدموع تملئ عيونها عن شعورها بعد رحيله: “حسيت إن جزء من قلبي دفنته معاه، اسوأ حاجة في الدنيا الفراق، إنك تبقي عايشة مع حد بتتنفسوا نفس الأوكسجين، فاهمك من غير ما تتكلمي، بيطبطب عليكي، كان إنسان شريف ونضيف، وعلى قد ما أنا حزينة لكن عارفة إن هو ان شاء الله ربنا كارمه هناك”.

وكشفت عن وصيتها له قبل وفاته مباشرة، قائلة: “قولت له مش عايزاك تتجوز لغاية ما أجيلك”.