آسر ياسين: “الراجل الغلط هو اللى بيجر مراته وراه زى البهيمة ويمد أيده عليها”
حرص النجم آسر ياسين، على توضيح الفرق بين الراجل الصح والراجل الغلط فى التعامل مع زوجته من وجهة نظر جده عبر حسابه على تويتر.
وكتب آسر ياسين، قائلاً: “جدي كان دايمًا يقوللي، عارف الفرق بين الراجل اللي صح والراجل الغلط؟ الراجل صح مرته بتمشي جدامه ويصونها زي الملكة، أما الراچل الغلط هو اللي بيجر مرته وراه زي البهيمة ويمد إيده عليها”.
جاء ذلك بعدما شغلت عروس الإسماعيلية الرأى العام في مصر والوطن العربي، على خلفية مشهد تعدى العريس بالضرب على عروسته لدى خروجها من الكوافير، وهو ما لقى ردود فعل غاضبة على مواقع التواصل الاجتماعى.
وقالت العروس مها محمد، 24 عامًا، إنها “صُدمت من رد فعل الناس على السوشيال”، متابعة: “أنا بحب عبد الله ومش مغصوبة على الجوازة”، بل زادت بأنها “تعصبت على الميك أب أرتست وعلى كل الناس قبل المشكلة، وهو ما تسبب في تطور الشجار مع عريسها”.
وأكدت العروس أنها تحب عريسها، قائلة: “أنا بحبه ومقتنعة بيه وكل حاجة، وطبعي إني عصبية وهو عصبني جامد”.
وعاش الشارع الإسماعيلاوي ليلة درامية، بدأت بالضرب وانتهت بالرقص ومشهد الاحتضان والحمام، وفي المنتصف عقدت السوشيال ميديا محاكم عاجلة لإدانة عريس انهال بالضرب على عروسه وسط الشارع، ما دفعه للخروج في مقطع مصور وأمامه “عشاء العرسان” وهو يحتضن عروسه ويحمد الله الذي نجاه من العين التي أصابتهما.
البداية بتداول مقطع مصور يظهر عريسًا من مدينة الإسماعيلية وهو ينهال بالضرب على عروسه أمام الكوافير، بشارع السطان حسين أمام المارة وأخذ يوجه لها اللكمات والصفعات دون النظر إلى أى اعتبارات أخلاقية أو عائلية، حتى أصبح تريند تداوله رواد مواقع التواصل الاجتماعي، وسط إدانة العريس.
كما تفاعل عدد كبير نجوم الفن والإعلام مع واقعة عروسة الإسماعيلية، التي تعرضت للضرب من زوجها قبل حفل الزفاف، معبرين عن استيائهم الشديدة بعد رجوعها إليه مرة أخرى.
نرصد لكم في السطور التالية، أبرز نجوم الفن والإعلام الذين علقوا على واقعة ضرب عروس الإسماعيلية.
ريهام سعيد لـ عروسة الإسماعيلية: «غلطتي.. إوعي تكملي زيي»
دعت الإعلامية ريهام سعيد عروس الإسماعيلية التي تعرضت للضرب من زوجها قبل حفل الزفاف، إلى عدم إكمال زيجتها حتى لا تستمر في القهر الذي يحدث لها، بحسب وصفها.
كتبت «ريهام» عبر حسابها الرسمي على موقع فيسبوك موجهة رسالتها إلى عروسة الإسماعيلية : «ممكن تبقي يتيمة ومالكيش حد وممكن يبقى في حد بس ملوش لازمة، لأنك تكملي الجوازه دي يبقي مالكيش حد فعلا».
وتابعت: «إوعي تغلطي غلطتي وتكملي في حاجة غلط من الأول، أنا حياتي بقت صعبة أوي بسبب قرار واحد غلط أخدته، عارفة ممكن يكون قالك إيه، بس إللي ما يحافظش على كرامتك يبقى مش بيحبك، إللي يرضى إنه يكسر بخاطرك في ليلة عمرك يبقى مش بيحس ولا بني آدم».
وأضافت: «غلطتي وأتمنى تصلحي غلطتك ليكي رب اسمه الكريم عارفة الكلام عن الستر وبيتك وجوزك وإن مالكيش حد والفضيحة وماينفعش تطلقي بعد يوم من الجواز كل ده أي كلام، اشتري نفسك وحياتك الناس مش هاتنفعك ربنا فضحه لحكمة عنده، أي ست خايفة وبتكمل حياة كلها مهانة وذل عشان مالهاش حد وخايفة من كلام الناس بقولك خلي عندك إيمان في اللي خلقك ربنا عمره ما هايسيبك».
وواصلت ريهام سعيد: «غلطتي غلطة عمرك إنك كملتي وهايبقي غلط أكبر لو استمريتي. هايضربك تاني وتالت ورابع وهايضربك قدام عيالك، ليه؟ عشان الحب؟ فين هو ده؟ ساعات في قرارات بتبقي صعبة أوي الواحد ياخدها بس لو نجح إنه ياخدها ويتحدي الناس والخوف هايشتري حياته إللي هايعيشها مرة واحدة بس».
واختتمت: «إنتي مش لوحدك مصر كلها معاكي والقانون في ضهرك والله إنتي دلوقتي مش لوحدك، من خلال فيديو خلى ملايين معاكي وفي ضهرك هايدعموكي ويحموكي لو حد يعرفها يوصل لها البوست لازم ننقذها، وننقذ أي حد بيفرط في كرامته وحياته عشان خايف. على فكرة عينيكي في الصورة كلها كسرة وحسرة وإجبار مهما قلتي عينيكي بتتكلم».
عصام السقا يهاجم العريس المعتدي على عروسه بالضرب يوم الفرح
هاجم الفنان عصام السقا، العريس حيث نشر صورة له وعلق عليها عصام: «إنت واد دكر كده.. عشان يثبت لأهله إنه راجل.. وهو معداش حتى من أمام شارع الرجولة، المقطع ده هيفضل وصمة عار هتلاحقك حتى ف أحلامك ي يا عم الدكر إنت».
هالة خليل: «مشهد أكل الحمام مقزز»
وأعربت المخرجة هالة خليل عن استيائها من فيديو صلح العروسين، بعد اعتداء الزوج على زوجته يوم الزفاف، خاصة مشهد «الحمام»، واصفة إياه بأنه شيء «مقزز».
وقالت «هالة» في منشور عبر حسابها الرسمي بموقع التواصل «فيس بوك»: «مشهد أكل الحمام ده مشهد مقزز.. كل الرجالة بتستعرض بوقاحة قدام الكاميرا وامرأة وحيدة محاطة بذراع وحش وعلى وجهها ابتسامة بلاستيكية تراقب المشهد في صمت ولم يطلب منها أحد أن تعبر عن نفسها ولو بجملة وحيدة.. أنا لو بخرج مشهد ذكوري فج مش هييجي على بالي المستوى ده».
رانيا يوسف: «المجتمع بيخوّف الستات»
علقت الفنانة رانيا يوسف على قضية ضرب الأزواج لزوجاتهم، وذلك تزامنًا مع واقعة عروس الإسماعيلية، التي تعرضت للضرب من زوجها قبل حفل الزفاف.
وقالت رانيا يوسف، في منشور لها عبر حسابها الرسمي بموقع الصور والفيديو «إنستجرام»: «لو الأهل بيحترموا ولادهم ومش بيضربوهم، مستحيل ولادهم يتقبلوا الضرب من حد تانى ويشوفوه شيء عادي».
وتابعت: «المجتمع اللى بيلوم الستات طول الوقت، هو اللى بيخوّف الستات تطلق».
مفيدة شيحة توجه رسالة لـ عروسة الإسماعيلية: «أكبر غلطة في حياتك»
أعربت الإعلامية مفيدة شيحة عن استائيها من رجوع عروسة الإسماعيلية إلى زوجها، خاصة بعد التعدي عليها بالضرب يوم الزفاف .
ونشرت «شيحة» صورة للعروسين، عبر حسابها الشخصي بموقع التواصل الاجتماعي «فيسبوك»، وعلقت قائلة: «أول مرة أعلق على حاجة بس اسمحيلي أيتها العروسة الجميلة اللي إنتي عملتيه ده أكبر غلطة في حياتك».
سهير جودة لـ عروسة الإسماعيلية: «انكسر روحها»
أعربت الإعلامية سهير جودة عن استيائها الشديد من عودة عروسة الإسماعيلية إلى زوجها، وذلك بعد تعدي زوجها عليها بالضرب في يوم الزفاف .
وقالت «جودة»، خلال تقديم برنامجها «الستات» الذي يذاع على شاشة النهار: «إن الواقعة تدل على أن جزءا من المجتمع يعتبر العنف والضرب شيئا عاديا».
