حالةمن الغضب عبر عنها الشاعر الغنائي بهاء الدين محمد، بعدما نشرت شيرين عبدالوهاب على خاصية استوري على موقع إنستجرام إجابتها عن سؤال أحد المتابعين والذي سألها : في أغنية ندمتي عليها؟ وكانت إجابتها : ماتجرحنيش، وهي من كلمات بهاء الدين محمد.

وكتب بهاء الدين محمد معلقًا على الأمر : مش متعود أرد على أى حد، ولكن لما حد يتجاوز حدوده لازم يقف مكانه ويعرف إنه مهما اتعود يغلط لازم ييجى عند بعض الأسماء ويحاسب ويخلى باله، وخاصة لما حد ف كل كارثة يدافع عنها.

وتابع : أول يوم دخلت شيرين عبدالوهاب مكتبى كانت مع الأستاذ نصر محروس اللى هو صاحب الفضل في تقديمها، وبعد دقائق من اللقاء لقينا شيرين بتبكى وسألها نصر بتعيطى ليه ردت : علشان أنا قاعدة مع الأستاذ بهاء.

وأضاف : رشحتها تغنى كتير بنعشق ولولا موافقة نصر احترامًا للعشرة اللى بيننا ماكانتش حتغنيها، لأنها كانت موقوفة من النقابة، لما فوجئت بمدير أعمالها الرجل اللى أنا بأحبه وبأحترمه لقيته بيكلمنى نيابة عنها ويقولى سمعنى الجديد، وده طبعًا خطأ لأن اللى بيغنى مهما كان اسمه مش المفروض يغلط غلطه زى دى.

واستكمل : أغنية ماتجرحنيش أنا لحد الآن مش عاجبنى غُنا شيرين مع احترامى الكامل لصوتها، وأكيد لولا الأستاذ نصر ماكانش حيتم اللقاء، وماتجرحنيش من أهم أعمالى ومن حقى أدافع عنها نتاج تهور اللى غنيتها، وكمان لأول مره ألاقى حد بيحارب نَفسه وبيغلط في مبدعين اشتركوا في صناعته.

وأنهى كلامه قائلًا : وعشان أكتب الكلام ده يبقى شيرين غلطانة كالعادة بس كان لازم أقولها ماتعمليش كدة تانى، وأنتى بتكبرى بس مش حتعدى حدود حجم بعض الأسماء ولا أعمالهم.